Embaixadór Austrália hasoru malu ho Alunus Timoran husi Univesrsidades Austrália
26 Fevereiru 2015
Embaixadór Austrália ba Timor-Leste, Peter Doyle, ohin kalan sei hasoru malu ho alunus Timor-oan hirak ne’ebé akaba tiha ona sira nia estudu husi universidade sira iha Austrália, ho apoiu husi bolsa-estudu ‘Australia Awards’, iha eventu jantar anuál ne’ebé hala’o iha Otel Timor.
Embaixadór sei aproveita eventu ne’e hodi lansa inisiativu foun hanaran Fundus Kiik Alunus Bolsa-Estudu ‘Australia Awards’. Governu Austrália fornese fundus kiik ho valór to’o US$5,000 (rihun-lima dolares Amerikanu) atu suporta Alunus Bolsa-Estudu “Australia Awards’ hodi partisipa iha oportunidades dezenvolvimentu profesionál no lideransa, no atu hametin sira nia rede ho organizasaun sira Austrália nian.
Ho apoiu Governu Austrália nian, Alunus no membrus Timor-Leste Australian Development Awards Alumni Association (TLAAA) hetan tiha ona konvite atu fahe sira nia esperiensia kona-ba sira nia estudu durante iha Austrália, iha eventu ne’e.
Sr. Doyle hateten katak nia haksolok tebes atu hasoru malu ho alunus husi universidades Austrália iha grupu ida, liu-liu alunus nain 37 ne’ebé foin lalais akaba sira nia estudu no fila hikas ona mai Timor-Leste.
“Austrália iha istória ida ne’ebé naruk no orgulloju kona-ba apoia oportunidades edukasaun tasi-balu nian ba Timor-oan sira,” nia dehan.
“Alunus Timor-oan sira estuda tiha ona iha Austrália iha nivél edukasaun aas hotu-hotu, komesa husi nivél Lisensiatura to’o nivél Doutoramentu.
“Desde program bolsa-estudu ‘Australia Awards’ hahu loke iha Timor-Leste iha tinan 2000, estudantes Timor-oan liu 330 mak hetan tiha ona bolsa-estudu hodi ba estuda iha Austrália.
“Alunus barak mak agora prense hela pozisaun senior nian iha governu, iha mediku, setor dezenvolvimentu no iha universidades lokál.”
“Ami orgullu tebes atu tulun Timor-oan sira atinji susesu nivel akademiku aas. Setor edukasaun Austrália nian mos suplementadu husi estudantes Timor-Leste ne’ebé lori sira nia esperiensia no konesementu uniku ba Austrália no hametin ligasaun ema ba ema entre ita nia nasaun.”
Progarama bolsa-estudu ‘Australia Awards’ mos suporta programa estajiariu ba gradudus – inisiativa uniku hodi fasilita alunu sira hodi hetan esperiensia servisu nian. Agora daudaun iha feto graduadus nain rua ne’ebé sei hahu sira nia estajiu iha fulan-Abril iha Ospitál Nasionál no Gabinete Prezidente nian.
|
Embaixador Australia hato'o diskursu iha eventu jantar alunus bolsa-estudu Australia Awards |
Embaixador Australia entrega sertifikadu ba alunu balsa-estudu Australia Awards |
