ESTRATÉJIA FOUN BA DEZENVOLVIMENTU DEFISIÉNSIA-INKLUSIVA

ESTRATÉJIA FOUN BA DEZENVOLVIMENTU DEFISIÉNSIA-INKLUSIVA

28 Maiu 2015

Governu Austrália iha semana ne’e lansa estratéjia foun ida atu hametin inklusaun ema ho defisiénsia iha nasaun sira ne’ebé sei dezenvolve hela.

Dezenvolvimentu ba Hotu-hotu 2015-2020: Estratéjia atu hametin dezenvolvimentu defisiénsia-inkluziva iha programa asisténsia Austrália nian sei apoia ema ho defisiénsia sira iha nasaun hirak ne’ebé sei dezenvolve hela atu hetan dalan hodi sai husi ki’ak no realiza sira-nia pótensia tomak. Estratéjia ida-ne’e harii husi primeira estratéjia Dezenvolvimentu ba Hotu-hotu, ne’ebé lansa iha tinan 2008.

Iha lansamentu ne’e, Ministra Negosiu Estranjeiru, Hon Julie Bishop MP hateten: “Asegura ita nia investimentu asisténsia hodi inklui ema sira ho defisiensia hanesan pratika dezenvolvimentu ne’ebé diak – kontribui ba redusaun kiak no kresimentu ekonomiku sustentavel no kria rezultadu dezenvolvimentu ne’ebé diak-liu ba hotu-hotu.”

Iha Timor-Leste, Austrália apoia Asosiasaun Defisiénsia Timor-Leste (ADTL) no Ra'es Hadomi Timor Oan (RHTO) hodi hasa’e númeru ema ho defisiénsia iha papél lideransa, asesu ba servisus no partisipa iha empregu.

Austrália nia apoiu ba ema ho defisiénsia iha ami-nia programa sira iha dezenvolvimentu komunitáriu, governasaun, saúde, edukasaun, estrada rurais, bee no agrikultura, atu garante katak laiha ema ida mak atu husik hela iha dezenvolvimentu Timor-Leste nia kotuk.

Dezenvolvimentu ba Hotu-hotu 2015-2020: Estratéjia hodi hametin dezenvolvimentu defisiénsia-inkluziva iha programa Austrália nian bele hetan iha http://dfat.gov.au/about-us/publications/Pages/development-for-all-2015-2020.aspx.