Australian Embassy
Timor-Leste

Austrália kontinua atu suporta Ministériu Saúde hodi halo ambulansia sira halai hikas iha estrada Timor-Leste

Austrália kontinua atu suporta Ministériu Saúde hodi halo ambulansia sira halai hikas iha estrada Timor-Leste

27 Fevereiru 2015

Governu Austrália suporta daudaun Ministériu Saúde atu hala’o medidas pratika hodi salva vida iha Timor-Leste liu-husi fasilita hadia ambulansia no veikulu sira saúde nian.

Ohin, Embaixadór Austrália ba Timor-Leste, Peter Doyle, hamutuk ho Vise Ministra Saúde, Dr Ana Isabel Soares, hodi lansa Fatin Inspesaun Ambulansia no Multi-funsaun foun iha Dili.

Ne’e hanesan inisiativa Ministériu nian ne’ebé Austrália sente orgullu atu ajuda. Sr. Doyle hateten, “Timor-Leste no Austrália hanesan nasaun vizinu, parseiru dezenvolvimentu no belun ne’ebé besik malu. Austrália prontu no komprometidu atu suporta Governu foun nia prioridades.”

“servisus ambulansia ne’ebé forte no konsistente sai nafatin prioridade imediatu ba Ministériu, no Austrália fornese daudaun orsamentu $ 1.8 million ( um pontu oitu milliaun dolares Australianu) atu suporta servisu ne’e”.

“Ambulansias importante tebes hodi lori ema moras sira iha emerjensia nia laran. Purezemplu, wainhira inan isin-rua sira hetan komplikasaun durante besik partu, ambulansias presiza lori sira ba ospital ho lalais no seguru – ne’e siknifika salva ona ema nain rua nia vida”.

Ministériu Saúde anunsia tiha ona katak fatin ambulansia hotu-hotu sempre iha veikulu servisu nian ida, no pursentu 85 husi veikulu multi-funsaun mak hala’o operasaun iha estrada. Veikulu hirak ne’e barak mak hadia tiha ona ho susesu iha oras 48 nia laran. Tinan ida liuba, iha deit pursentu 56 ambulansias mak eziste nasionalmente.

Ministériu Saúde no ekipa mekaniku ida husi Austrália oras ne’e daudaun servisu hamutuk hodi kontinua implementa ‘mekaniku movél’ ne’ebé halo manutensaun regulár (fulan tolu-tolu) no hadia uit-oan veikulu ambulansias no multi-funsaun sira iha munisipiu 13. Iha ekipa servisu rua, ekipa ida toma konta iha parte leste no ida seluk iha oeste, ne’ebé jere husi Ministériu Saúde.

Ministériu Saúde mos kontinua implementa sistema GPS (Global Positioning Satellite) ba jerente sira iha Dili atu monitoriza kona-ba uzu kombustivel ba veikulu ambulansia sira hotu-hotu iha munisipiu 13 nia laran. Liutan, funsionarius Ministériu Saúde liu nain 100 mak hetan tiha ona treinamentu kona-ba oinsa atu responde trauma no dizastre.

Programa hadia no manutensaun ba ambulansia hanesan parte husi Governu Australia nia programa saude ba Timor-Leste hodi aloka orsamentu (AUD$28 million ba primeiru tinan haat). Programa ne’e atu hadia rezultadu saúde nian iha distritu 13, liu-liu ba feto no labarik sira.

Embaixador Australia (klaran) hamutuk ho Diretor Geral husi Ministeriu Saude (liman-loos) koalia hela ho mekaniku ambulansia Timor-oan nian iha Sentru Ambulansia Comoro, Dili. Foto husi: DFAT

Embaixador Australia (liman loos) hamutuk ho Diretor Geral husi Ministeriu Saude (klaran) rona esplikasaun husi xefe ekipa mekaniku John Moore iha Sentru Ambulansia Comoro, Dili. Foto husi: DFAT
 

Embaixador Australia hato'o diskursu iha lansamentu ambulansia  iha Sentru Ambulansia Comoro, Dili. Foto husi: DFAT

Embaixador Australia no Diretor Geral husi Ministeriu Saude (klaran hasai foto hamutuk ho mekaniku ambulansia Timoran nian iha lansamentu ambulansia iha Sentru Ambulansia Comoro, Dili. Foto husi: DFAT