PM Gusmão Vizita Sentru Treinamentu Lingua Ingles F-FDTL iha Metinaro

PM Gusmão Vizita Sentru Treinamentu Lingua Inglés F-FDTL iha Metinaro

14 Janeiru 2015

Primeiru Ministru no Ministru Defeza no Seguransa Timor-Leste, Kay Rala Xanana Gusmão foin lalais iha loron Kuarta, 14/01 vizita Sentru Treinamentu Lingua Inglés Falintil-Forsa Defeza Timor-Leste (F-FDTL) nian iha Metinaro ne’ebé hetan apoiu husi Governu Austrália liu husi ninia Programa Kooperasaun Defeza (DCP).

Sekretáriu Estadu Defeza, Julio Tomas Pinto, no Xefi Estado Forsa Armadas, Coronel Falur Rate Laek mos marka prezensa iha eventu ne’e.

Durante vizita iha Sentru refere, Primeiru Ministru Gusmão apresia tebes ho fornesimentu fasilidade ne’ebe fó benefisiu ba membrus F-FDTL nian. Nia enkoraja membrus F-FDTL sira atu pratika sira nia lingua Inglés loro-loron. Primeiru Ministru Gusmão mos bolu membru F-FDTL ida-idak ne’ebé durante ne’e tuir kursu iha klase laran hodi hakat ba oin no halo aprezentasaun iha lingua Inglés atu nune’e nia bele rona direitamente.

Entretantu Primeiru Ministru Gusmão mos tara tais ida ba Major Gabrielle Prideaux husi DCP ne’ebé durante tinan rua nia laran jere fasilidade refere no sei fila hikas  ba Austrália iha tempu badak nia laran.

Graduantes balu hetan tiha ona oportunidade ba iha rai liur hanesan Austrália, Nova Zelandia, Estadu Unidos no nasaun sira seluk hodi tuir treinamentu no akademia militár atu nune’e sira bele fila hikas mai Timor-Leste hodi dezenvolve instituisaun F-FDTL nian sai diak liu-tan iha futuru.

Alende Sekretáriu Estadu Pinto hato'o ba media ne’ebé marka prezensia iha eventu ne’e katak involvimentu membrus F-FDTL nian atu aprende lingua inglés importante tebes tanba sei fasilita sira nia kolokasaun ba iha misaun Organizasaun Nasoins Unidas (ONU) nian.