Embaixadadór Austrália entrega ekipamentu ba Ministeriu Saúde
22 Dezembru 2014
Embaixadór Austrália ba Timor-Leste, Sr. Peter Doyle, ohin ofisialmente entrega ekipamentu sistema informasaun saude no monitorizasaun no evaluasaun (M&E) nian ba Ministeriu Saúde, nu’udar parte husi Austrália nia asistensia ne’ebé lao dadaun hodi hasae sistema saude no situasaun saude iha Timor-Leste.
Embaixadór ho Ministru Saude Timor-Leste nian, Dr. Sergio Lobo, ohin hamutuk iha seremonia ne’ebé halao iha edifisiu Ministeriu nian iha Dili.
Ekipamentu teknolojia informasaun (TI) hirak ne’e sei fasilita pesoal saúde sira iha fasilidade saúde nivel distritu, sub-distritu, no suku hodi bele halibur no transfere informasaun kedas ba software sentrál iha Ministeriu Saúde nia laran ho lalais no tuir dalan ne’ebé seguru.
“Ekipamentu hirak ne’e hanesan instrumentu importante ba Ministériu hodi bele hetan informasaun kona-ba sistema no kondisaun saúde no informasaun lalais no ne’ebé tuir dalan ne’ebé seguru. Ekipamentu hirak ne’e mos sei tulun atu fasilita monitorizasaun no jestaun asisténsia saude, no mos bele permite parseiru sira atu aliña no evita dezenvolvi tan sistema paralelu,” dehan Sr. Doyle.
“Austrália orgulhu tebes ho ninia parseria ho governu Timor-Leste hodi bele hadiak rezultadu saude ba ema Timor-oan liu husi kombinasaun dezenvolvimentu kapasidade institusional no asistensia direta.”
Ekipamentu hirak ne’e mak hanesan desktop komputadór hamutuk atus ida nen nulu (160), tablet ualu nulu (80) ho parte ekipamentu seluk tan ba fasilidade saude sub-distritu 65 no postu saude hirak iha Timor laran tomak ba faze dahuluk.
Ekipamentu ne’e ho valor dollar Australianú $418,000 no mos reprezenta Austrália nia kompromisu atu kontinua apoia Ministeriu Saude Timor-Leste nian hodi forñese asisténsia ne’ebé diak liu-tan ba Timor-oan sira. Apoiu ne’e mos liga ho Austrália nia programa hirak seluk hanesan Liga Inan (Mobile Mums) ne’ebé mos implementa husi kompañia teknolojia, Catalpa.
|
|
(Husi liman karuk ba liman los) Organizasaun Mundial ba Saude, Dr. Rajesh Pandav, Vise-Ministra Saude Sra. Natalia de Araujo, Embaixadór Austrália ba Timor-Leste Peter Doyle, Ministru Saude Dr. Sergio Lobo, no Sra Agostinha Seguradu, Diretor Serbisu Saude Distritu Dili, hatudu manual ba Monitorizasaun no Evaluasaun ne’ebé funsunario Ministeriu Saude no parseiru sira sei uza hamutuk ho ekipamentu teknolojia informasaun husi Austrália. Foto ne’e hasai iha seremonia iha Dili, loron 22 fulan Dezembru 2014. Foto husi: DFAT |
