Forsa Naval Austrália fó treinamentu maritima ba F-FDTL

Forsa Naval Austrália fó treinamentu maritima ba F-FDTL

18 Dezembru 2014

Ró boot Forsa Naval Austrália, HMAS Huon mai vizita Dili, Timor-Leste husi loron 11-15 Dezembru 2014 hodi hala’o treinamentu hamutuk ho Komponente Naval husi Falintil-Forsa Defeza Timor-Leste (F-FDTL) nu’udar parte husi relasaun bilaterál defeza ne’ebé besik entre nasaun rua.

Iha programa Kooperasaun Defeza nian, ekipa HMAS Huon lori membrus F-FDTL nain 13 hodi fahe koñesementu kona-ba marina, luku, kontrolu ba estragus, kombate ahi, manutensaun ba ekipamentu seguru no mos treinamentu enjeñaria iha Portu Dili, Timor-Leste.

Programa Kooperasaun Defeza (DCP) hala’o iha Timor-Leste hahú iha tinan 2001, nu’udar parte husi atividades kooperasaun iha rejiaun Pasifiku. Programa ne’e atu harii kapasidade iha F-FDTL no Sekretaria Estadu ba Defeza nian atu nune’e nasaun ne’e bele fornese ba ninia seguransa rasik.

Forsa Naval Austrália dedikadu tebes atu servisu besik liu ho Austrália nia nasaun perseiru sira iha aréa seguransa maritima hodi asegura rejiaun ida ne’ebé seguru, hakmatek no prosperu.