Embaixada Austrália iha Timor-Leste selebra Loron Internasionál Voluntáriu nian 2014
5 Desembru 2014
Embaixadór ba Timor-Leste, Peter Doyle, hala’o eventu hemu xa dader hamutuk ho voluntáriu sira Austrálinu nian no sira nia kontraparte lokál hodi selebra sira nia kontribuisaun ba Governu Austrália nia programa dezenvolvimentu iha Timor-Leste, hanesan parte husi Loron Internasionál Voluntáriu nian.
Tinan-tinan, programa Voluntáriu Austrália ba Dezenvolvimentu Internasionál (AVID), liu-husi programa asisténsia Governu Austrália nian, iha kualker fatin sira gasta semana balun ate liu tinan ida liu-husi iha sira nia kolokasaun ho organizasaun lokál. Voluntáriu sira ne’e kontribui sira nia koñesimentu, matenek, tempu no vontade diak ba organizasaun lokál atu nune’e sira iha kbiit diak liutan hodi alkansa sira nia objetivu.
Programa AVID fasilitadu iha Timor-Leste liu-husi organizasaun sira: Scope Global, Australian Volunteers International (AVI), no Cruz Vermelha. Embaixadór mos rekoñese Voluntáriu sira ne’ebé hala’o servisu liu-husi Palms no Engineers Without Borders (EWB) ne’ebé mos atende iha eventu ohin dader ne’e.
Sr. Doyle dehan katak objetivu husi programa ne’e atu promove kresimentu ekonomia no redusaun pobreza iha rejiaun Indo-pasífiku, ne’ebé inklui Timor-Leste, liu-husi fó asisténsia ba organizasaun sira ne’ebé simu sira hodi fó rezultadu dezenvolvimentu ida ne’ebé efetivu no sustentavel.
“Foin lalais ne’e, liu-husi programa AVID, kuaze voluntáriu nain 60 mak hala’o servisu iha Timor-Leste iha aréa saúde, defisiensia, jenéru, hasa’e kapasitasaun institusionál,” Sr. Doyle hateten.
“Eventu ohin ne’e mos nu’udar rekoñesimentu ida ba ita nia voluntáriu sira husi ita nia kontraparte lokál, ne’ebé sai hanesan uma-nain diak ba voluntáriu Austrálianu sira no hanorin sira kona-ba Timor-Leste nia kultura no língua.”
Iha mundu tomak, programa AVID suporta voluntáriu Austrálianu kuaze rihun-rua (2000) iha nasaun haat-nulu (40) resin. Programa ne’e hanesan parte ne’ebé importante no dura ba programa asisténsia Governu Austrália nian, ne’ebé atu ajuda halo mudansa no mos harii ligasaun ema-ba-ema ne’ebé kleur ho Austrália.
Informasaun liutan kona-ba programa AVID bele hetan iha website ne’e: www.australianaidvolunteers.gov.au/
|
Australian Red Cross Country Manager Peter Lomas, In-country Manager Australian Volunteers International (AVI) Cathy Molnar, Australian Ambassador to Timor-Leste Peter Doyle, Scope Global Country Manager Naomi Toole, EWB In-country Coordinator Mel Bencik, hamutuk kua bolu (cake) hodi marka Loron Internasionál Voluntáriu nian, Dili, 5 Desembru 2014. Foto husi: DFAT |
Representativu ONG Empreza Diak Filomena Noronha, Embaixador Peter Doyle no voluntaria husi programa AVID Emily Evans, hamutuk iha eventu xa dader hodi marka Loron Internasionál Voluntáriu nian, Dili, 5 Desembru 2014. |
