Kareta Ambulansia Timor-Leste halai hikas iha estrada
13 Outubru 2014
Ohin Ministériu Saúde anúnsia katak um terco husi kareta ambulansia ne’ebé aat hadia tiha ona no prontu ona atu funsiona hikas fali iha estrada. Totál kareta ambulansia hamutuk 31 mak hadia tiha ona iha tinan ida ne’e nia laran.
Embaixadór Austrália ba Timor-Leste, Peter Doyle, hamutuk ho Ministru Saúde Timor-Leste, Dr Sergio Lobo, hala’o lansamentu ba programa foun kona-ba Programa Manutensaun Ambulansia no ofisina foun ida iha Dili.
Ida ne’e hanesan inisiativa ida husi Ministériu nian ne’ebe Governu Austrália sente orgullu atu suporta. Senhor Doyle dehan programa ambulansia ne’e hanesan pratika ida ba salva vida ne’ebé sei tulun ema sira iha aréa remotas atu asesu ba atendimentu saúde nian.
|
|
 Embaixador Austrália, Peter Doyle, hato'o diskursu iha inagurasaun iha Caicoli, Dili. Foto: Embaixada Austrália iha Dili |
“Austrália iha komprimisu boot atu suporta hela prioridades Ministériu Saúde nian hodi hadia rezultadu saúde iha distritu 13. Ami kontenti tebes atu servisu hamutuk ho Ministériu Saúde hodi suporta programa manutensaun. Ambulansia sai hanesan aset importante ida ne’ebé tenke hetan manutensaun,” Senor Doyle hateten.
“Sistema transporte ida ne’ebé konsistente no forte mak sai hanesan prioridade imediata Ministériu nian, no Austrália suporta hela miliaun 1.2 dolares Australianu ba tinan rua atu suporta programa ne’e.”
 Ministru Saúde Timor-Leste, Dr Sergio Lobo hamutuk ho Embaixadór Austrália vizita sentru foun ba Programa Manutensaun Ambulansia. Foto: Embaixada Austrália iha Dili |
 Xefi Fasilitador Transporte, Jon Moores (liman karuk), vizita sentru foun hamutuk ho Ministru Saúde, Diretor Departamentu Saude no Embaixadór Austrália. Foto: Embaixada Austrália iha Dili |
Ministériu Saúde mos harii hela ‘mekaniku movel’ ne’ebe sei halo manutensaun regularmente (fulan tolu-tolu) no hadia kareta ambulansia no multi-funsaun iha distritu 13. Iha ekipa rua ne’ebe sei eziste hodi hala’o servisu iha parte leste no oeste, ne’ebé jere diretamente husi Ministériu rasik.
Ministériu Saúde mos harii tiha ona Sistema GPS ba jerente sira iha Dili atu monitoriza mina kareta nian no taumatan ba kareta sira.
Programa ne’e mos fó apoiu ba emprezáriu lokál liu-husi asesu ba fornesimentu pesa kareta lokalmente no asesu ba mekaniku lokál.
 Jon Moores hamutuk ho ekipa Programa Manutensaun Ambulansia hatudu sentru foun ba Embaixadór Austrália. Foto: Embaixada Austrália iha Dili |
 Membru ekipa Programa Manutensaun Ambulansia hatudu sentru foun ba Embaixadór Austrália. Foto: Embaixada Austrália iha Dili |