Austrália fornese apoiu kontinuasaun  ba Programa Edukasaun Lian-Inan Timor-Leste

Austrália fornese apoiu kontinuasaun ba Programa Edukasaun Lian-Inan Timor-Leste

9 Jullu 2014

Iha loron 09, fulan-Jullu 2014 – Ministériu Edukasaun, Governu Austrália no Komisaun Nasionál UNESCO Timor-Leste hamutuk hodi selebra parseria kona-ba sira nia apoiu ba Programa Edukasaun Multilíngua Bazeia ba Lian-Inan. Iha eventu ne’ebé hala’o iha Ministériu Edukasaun Dili, Vice-Ministra Pré-Escolar no Ensino Básico Sra. Dulce de Jesus Soares no Embaixadór Austrália, Sr. Peter Doyle, hato’o sira nia komprimisiu atu hadia rezultadu edukasaun iha Timor-Leste.

Komisaun Nasionál Timor-Leste ba UNESCO mak hala’o pilotu kona-ba uza lian-inan iha inisiu hahú eskola. Pilotu ne’e suporta pré-eskolar nén (6) no eskola bazika nén (6) iha distritu tolu mak hanesan Lautem, Manatuto no Oecusse.

Governu Austrália fornese daudaun fundus adisionál hamutuk US$450,000 dolares Amerikanu atu suporta Komisaun Nasionál UNESCO hodi hala’o projetu ne’e ba períodu tinan rua tan. Ne’e sei kompleta Austrália nia kontribuisaun totál ba pilotu ne’e hamutuk liu US$900,000 dolares amerikanu hahú husi tinan 2013.

Embaixadór Doyle dehan “Austrália iha kompromisu atu hadia rezultadu edukasaun iha Timor-Leste. Liu husi fó apoiu ba Governu Timor-Leste nia prioridades ne’e, Governu Austrália hadia hela asesu ba edukasaun kualidade, tulun labarik no foin-sae timoroan sira atu partisipa iha dezenvólvimentu ekonomia, sosiál no polítika nasaun nian.”

Pilotu ne’e sensibiliza tiha ona komunidade sira kona-ba importansia edukasaun lian-inan, formasaun profesores kona-ba kuríkulu no metodolojia bazeia ba lian-inan, no dezenvolvimentu rekursu iha linguajen lokál. Ne’e inklui livrus kona-ba alfabetus, le’e nain no istória. Rezultadu husi pilotu ida ne’e sei ajuda metodolojia kona-ba programa multilíngua bazeia ba lian-inan nian ne’ebé sei habelar liutan ba iha distritu sira seluk.