Inagurasaun ba sentru komunidade PNDS iha Mota Ulun, Distritu Liquica

20 Junu 2014

Ofisias husi Embaixada Austrália ba Timor-Leste halibur hamutuk ho komunidade Mota Ulun, iha Disrtitu Liquisa, hodi halo lansamentu ba sentru komunidade foun ne’ebé mak parte husi Programa Nasionál ba Dezenvolvimentu Suku (PNDS).

Ne’e hanesan inagurasaun ba dala tolu nian hafoin seremonia PNDS nia sistema be’e mos foun ne’ebe foin halao iha iha suku Humboe, Distritu Ermera, iha loron 18 Junu, no sub-aldeia Uma Heuk, Distritu Manatutu, iha loron 12 Junu. Eventu sira ne’e marka inagurasaun ba programa PNDS iha Timor-Leste laran tomak.

Sekretáriu-Estadu ba Dezenvolvimentu Lokál, Samuel Mendonça, no mos representativu sira husi Embaixada Australia marka prezensa hodi inagura fasilidade foun ne’e.

PNDS hanesan programa ne’ebé husu komunidade sira kona-ba sira nia nesesidade ba infraestrutura no sira hili sentru komunidade ne’e hanesan prioridade ba dezenvolvimentu ho komunidade Mota Ulun.

“Governu Austrália sente orgulhu atu serbisu em parseria ho Governu Timor-Leste iha programa prinsipál nasionál ida ne’e hodi halakon pobreza,” dehan Kathy Richards, Sekretaria Premeiru (Desenvolvimentu) iha Emaixada Austrália, ohin bainhira nia marka presensia iha inagurasaun iha Mta Ulun.

“Hahu desde tinan 2011, Austrália servisu besik-liu ho Timor-Leste kona-ba kriasaun ba PNDS. Liu husi apoiu Austrália ba program PNDS, agora ita bele haree ona ninia rezultadu iha nivél komunidade hanesan sentru komunidade ne’e.”

PNDS hanesan programa baze ne’ebé kontribui ba dezenvolvimentu rurál liu husi alokasaun fundus ba iha infraestrutura báziku suku nian. Programa ne’e hetan fundus barak liu husi Governu Timor-Leste ho valór orsamentu hamutuk miliaun 294.3 dolar Amerikanu ne’ebé alokadu iha orsamentu jerál estadu nian ba durasaun tinan walu. Iha fulan-Maiu 2014, Embaixadór Australia Peter Doyle asina akordu subsidiáriu ida ho Ministru Administrasaun Estatal atu fornese apoiu orsamentu tan ho valór miliaun 45 ba programa ne’e ba durasaun tinan tolu.


Sekretáriu-Estadu ba Dezenvolvimentu Lokál, Samuel Mendonça, no Kathy Richards, Sekretaria Premeiru (Desenvolvimentu) iha Emaixada Austrália, bainhira sira marka presensia iha inagurasaun iha Mta Ulun. Foto: Embaixada Australia iha Dili	Sentru komunidade foun ne’e mak parte husi Programa Nasionál ba Dezenvolvimentu Suku (PNDS). Foto: Embaixada Australia iha Dili