Inagurasaun ba Projetu PNDS iha Uma Heuk

Inagurasaun ba Projetu PNDS iha Uma Heuk

12 June 2014

Reprezentante husi Embaixada Austrália no Governu Timor-Leste ohin halibur malu ho komunidade sira iha Umaheuk, iha sub-distritu Lakloo, distritu Manatuto hodi halo inagurasaun ba Sistema foun bee moos ida ne’ebé mak fazparte husi Programa Nasionál ba Dezenvolvimentu Suku (PNDS).

Umaheuk hanesan aldeia rurál ida ne’ebé lokalizadu iha suku Laku Mesac, kuaze oras haat husi Dili. Uma-kain 60 ne’ebé hela iha aldeia ne’e sempre susar atu asesu ba bee moos, liuliu iha tempu bailoron naruk (iha fulan-Augostu).

Wainhira PNDS husu kona-ba sira nia prioridade ba dezenvolvimentu, populasaun iha aldeia Umaheuk ne’e hili atu harii sistema bee moos sai hanesan sira nia prioridade prinsipál. Sistema bee moos ne’e harii ho bee tanki rua iha sira nia bee matan okos, no ninia konstrusaun remata ho partisipasaun ativu husi komunidade rasik.

Ministru Administrasaun Estatal, Jorge da Conceição Teme, Sekretáriu-Estadu ba Dezenvolvimentu Lokál, Samuel Mendonça, Sekretáriu-Estadu ba Bee, Saneamentu no Urbanizasaun, Elias Pereira Moniz, no Minister-Counsellor ba Dezenvolvimentu husi Embaixada Austrália, Vincent Ashcroft, mós marka prezensa hodi inagura fasilidade foun ne’e.

“Governu Austrália sente orgulhu atu serbisu em parseria ho Governu Timor-Leste iha programa prinsipál nasionál ida ne’e hodi halakon pobreza,” Sehnor Ashcroft dehan.

“Austrália servisu besik liu ho Governu Timor-Leste kona-ba kriasaun PNDS desde hahú iha tinan 2011 no agora ita bele haree ona ninia rezultadu iha nivél komunidade hanesan iha Umaheuk ida ne’e.”

PNDS hanesan programa baze ne’ebé kontribui ba dezenvolvimentu rurál liu husi alokasaun fundus ba iha infraestrutura báziku suku nian. Programa ne’e hetan fundus barak liu husi Governu Timor-Leste ho valór orsamentu hamutuk miliaun 294.3 dolar Amerikanu ne’ebé alokadu iha orsamentu jerál estadu nian ba durasaun tinan walu. Iha fulan-Maiu 2014 Embaixadór Austrália ba Timor-Leste, Peter Doyle, asina akordu subsidiáriu ida ho Ministru Administrasaun Estatal atu fornese apoiu orsamentu tan ho valór miliaun 45 ba programa ne’e ba durasaun tinan tolu.