Expo halo ligasaun entre estudante Timor-Leste ho Universidade Australiánu

Expo halo ligasaun entre estudante Timor-Leste ho Universidade Australiánu

8 Augusto 2014

Expo anuál Universidade Austrálianu sira, ofisialmente loke husi Embaixadór Austrália ba Timor-Leste, Peter Doyle, iha Timor Plaza, Dili iha loron 8 fulan Augustu.

Expo ne’ebe hetan apoiu husi Governu Austrália liu-husi programa bolsu estudu ‘Australia Awards’ fó oportunidade ba universidade Australiánu sira hodi hatudu sira nia institusaun, no mos halo sosializasaun kona-ba programa bolsu estudu ne’e.

Sesaun dadeer iha expo ne’e loke deit ba estudante sira ne’ebé hetan ona bolsu estudu hodi ajuda sira halo desizaun kona-ba oinsa hili kursu no universidade. Sesaun loraik iha expo ne’e loke ba publiku tomak hodi fahe informasaun kona-ba vida jerál no estudu iha Austrália.

Sr. Doyle hato’o ona parabens ba kandidatu nain rua nulu resin tolu (23) ne’ebé hetan ona bolsu estudu no benvindu ba reprezentante sira husi universidade Austrália sanulu resin ualu (18).

“Austrália iha kompromisu boot ba atu fornese oportunidade edukasaun nivel aas ba estudante Timor-oan, atu nune’e sira bele halo kontribusaun ne’ebé pozitivu ba Timor-Leste nia futuru hanesan governu, sosiedade sivil ka setór privadu.”