LANSAMENTU BA NEW COLOMBO PLAN

LANSAMENTU BA NEW COLOMBO PLAN

Iha loron Kinta-Feira, 3 Setembru, Embaixadór Austrália hamutuk ho Governu Timor-Leste, Vice Retór Universidade Nasionál Timor Lorosa’e (UNTL) no reprezentantes husi emprezáriu sira sei lansa New Colombo Plan iha Timor-Leste. New Colombo Plan ne’e sei lori estudantes foin-sae Austrália nian ne’ebé hakarak atu aprende kona-ba kultura, istória no lala’ok moris iha Timor-Leste.

Iha lansamentu ne’e, sei simu estudantes nain tolu ne’ebé mak foin to’o husi Universidade Federasaun, Victoria. Estudantes majistériu nain tolu ne’e sei koloka ba iha eskola primaria lokál sira iha Timor-Leste durante semana tolu nia laran hanesan parte husi sira nia treinamentu pratika. Estudante hirak ne’e sei habelar liután sira nia koñesementu no sei hetan esperiénsia foun kona-ba hanorin eskola sira iha Timor-Leste.

Alende aprende rasik, estudante hirak ne’e mos sei kontribui sira nia koñesementu no matenek ba iha komunidade.Totál estudantes hamutuk nain 88 husi universidade hitu iha Austrália mak sei mai iha Timor-Leste iha periodu tinan 2015-16. Estudante hirak ne’e mai husi siénsia dixiplina oioin inklui edukasaun, saúde, informasaun teknolojia no kultura. Sira sei mai hela, aprende no hetan kolokasaun ba iha fatin barak iha Timor-Leste.

Estudante sira ne’e sei fila hikas ba Austrália ho vizaun no komprensaun foun kona-ba Timor-Leste no amizade ne’ebé sei rohan-laek.New Colombo Plan ne’e hanesan inisiativa ida husi Governu Austrália atu hasa’e koñesementu estudantes Austrália nian kona-ba rejiaun Indo-Pasifiku.