Preparasaun ba Ezersísiu Harii Hamutuk 2016 kontinua la’o
29 Setembru 2016
Enjeñeiru sira husi F-FDTL, Austrália no Militár Estadus Unidus, no Forsa Auto Defesa Japaun prepara hela atu hala’o Ezersísiu Harii Hamutuk husi 3 Outubru to’o 4 Novembru 2016. Durante ezersísiu ne’e, enjeñeiru sira sei kompleta projetu dezenvolvimentu infrastrutura iha baze militár Hera no Metinaro, inklui komunidade iha área Metinaro.
Membru sira husi nasaun haat refere sei servisu hamutuk hodi konstrui fasilidade militár nian sira hodi hasae kapabilidade F-FDTL nian, nomos hadi’ak Fasilidade Saúde Metinaro nian ne’ebé importante tebes ba komunidade lokál sira. Ezersísiu Harii Hamutuk sei fornese oportunidade ba Enjeñeiru F-FDTL nian sira hodi servisu hamutuk ho ekipa konstrusaun sira husi Austrália, EUA, no Japaun atu bele dezenvolve sira nia abilidade lideransa no téknika.
Ezersísiu Harii Hamutuk iha 2015 partisipa husi feto no mane liu 100 no tinan ida ne’e ezersísiu refere sei boot liu. Sei iha partisipante husi Enjeñeiru Kombate Rejimentu 1 Austrália nian, Naval Estadus Unidus, Korpu Marina Estadus Unidus, Forsa Auto Defesa Japaun, no foin ba dahuluk Ezérsitu Estadus Unidus partisipa iha ezersísiu ne’e. Austrália, Japaun, no Estadus Unidus sei oferese enjeñeiru feto no mane ne’ebé kualifikadu hodi ajuda no treina enjeñeiru F-FDTL no nia unidade sira seluk.
Maske Ezersisiu Harii Hamutuk foka liu ba iha enjeñaria no konstrusaun, maibe ba –ezersisiu tinan ida ne’e nian mós sei fornese treinamentu ba F-FDTL konabá instrutór fíziku, ekipamentu planta no treinamentu ba motór (mesin) ki’ik oan.
Tinan kotuk, Ezersísiu Harii Hamutuk konstrui aula rua, akomodasaun, no hariis-fatin iha Baze Naval Hera ho susesu, inklui hadi’ak fasilidade sáude/klínika komunidade Hera nian. Projetu sira ne’e nu’udar parte husi projetu infraestrutura seluk ne’ebé hala’o iha ezersísiu refere durante ne’e. Enjeñeiru F-FDTL sira benefísia ona ba treinamentu iha abilidade oioin; hanesan hada blok, karpintaría, servisu eletrisidade, kanalizasaun no prepara dokumentu ba transferénsia propriedade.
Oportunidade treinamentu hanesan Ezersísiu Harii Hamutuk sai nafatin parte esensiál ba Austrália nia Programa Kooperasaun Defeza kuntinuadas, Servisu Kooperasaun Defeza Estadus Unidus, no ba Programa Kooperasaun Defesa Japaun nian iha Timor-Leste. Treinamentu kolaborativu ne’e demonstra kooperasaun longu-prazu entre Austrália, Estadus Unidus no Japaun hodi apoiu dezenvolvimentu kapabilidade defeza Timor-Leste nian.