Tribunál Permanente Arbitrajen
KOMUNIKADU IMPRENSA
Konsiliasaun entre Repúblika Demokratika Timor-Leste no Commonwealth of Australia
Singapore, 13 Outubru 2016
Iha optimismu barak iha Sorumutu Komisaun Konsiliasaun foin daudaun. Delegasaun sira husi Timor-Leste no Australia hala’o sorumutu konfidensiál lubuk ida ho Komisaun Konsiliasaun iha Singapura semana ida ne’e, iha konsiliasaun ne’ebé inisia entre Repúblika Demokratika Timor-Leste (“Timor-Leste”) no Commonwealth of Australia (“Australia”) bazeia ba Aneksu V Konvensaun Nasoins Unidas kona-ba Lei Tasi nian (kona-ba “Konvensaun”).
Konsiliasaun ne’e kona-ba fronteira maritima entre Timor-Leste no Australia no inisia husi Timor-Leste ho maneira Notifikasaun ba Australia bazeia ba Artigu 298 no Aneksu V Konvensaun ninian. Konsiliasaun ne’e hala’o daudaun ho assisténsia husi Tribunál Permanente Arbitrajen (TPA).
Parte Rua no Komisaun konkorda katak sorumutu ne’e produtivu tebes. Hotu-hotu konkorda ho objetivu atu alkansa konkordansia iha tempu prosesu konsiliasaun nian.
“Hau haksolok tebes hodi haree vontade sinseru husi parte rua tuur hamutuk ho espiritu kooperasaun,” lia tatolin husi Prezidente Komisaun Konsiliasaun, S.E. Embaixadór Taksøe-Jensen. “Parte rua ne’e presiza hetan gava tanba sira prontu avansa hodi ultrapasa deferensas iha pasadu no servisu makaas hodi kria kondisaun ne’ebé kondusivu hodi hetan konkordansia, no mos estabilidade entertantu ba parte interesante sira seluk iha Tasi Timor.”
Sr. Gary Quinlan AO, Sekretáriu Adjuntu, Departamentu Australia ba Negosiu Estranjéiru no Komersiu, xefe delegasaun Australia akresenta, "Australia involve ho boa fé iha prosesu konsiliasaun ho Komisaun no Timor-Leste. Prosesu ida ne’e konfidensiál entaun hau labele to’o iha ninia detaillu wanhira diskusaun ne’e lao hela. Australia konserteza haree prosesu ne’e ho Komisaun no Timor-Leste hanesan konstrutivu, no ami sei kontinua involve iha laran ho seriu." "Hau fahe optimismu husi ita nia belun Australia," dehan S.E. Ministru Xanana Gusmão, Negosiadór Prinsipál ba Timor-Leste. "Atmosfer pozitivu tebes no agora ami iha dalan ne’ebé loos. Maibé ami konkorda tiha ona ho prosesu ne’ebé lao ho konfidensiál liu. Nune’e, hau labele koalia liután agora.”
Parte sira no Komisaun konkorda sorumutu sira tenke sai konfidensiál liu, no katak sei laiha deklarasaun ba imprensa kona-ba saida mak diskute tiha ona entre parte rua.
Pasu tuir mai
Sorumutu lubuk ida entre Parte sira no Komisaun hein katak sei akontese iha tinan oin mai. Komisaun antisipa katak sorumutu sira iha futuru sei kontinua akontese ho ambitu nebe konfidensial atu nune’e bele fornese ambiente ida nebe kondusivu hodi fasilita susesu final konsiliasaun ninian, maske deklarasaun publiku konjuntu halao husi tempu ba tempu.
Tribunál Permanente Arbitrajen nia website: http://www.pcacases.com/web/view/132