Mudansa ba iha Programa’ Seasonal Worker’

Mudansa ba iha Programa’ Seasonal Worker’

20 Marsu 2015

Governu Austrália anunsia tiha ona mudansa ba iha programa ‘Seasonal Worker’ ne’ebé sei fó benéfisiu ba agrikultór no emprezáriu sira Austrália nian, no mos traballadór sira husi Timor-Leste no Pasifíku.

Embaixadór Austrália ba Timor-Leste, Sr. Peter Doyle simu tiha ona mudansa hirak ne’e “Program ‘Seasonal Worker’ ne’e fó oportunidade diak ida ba feto no mane Timor-oan sira atu ba serbisu iha Austrália, ho traballadór sira sei hetan esperiensia diak tebes, abilidade no rendimentu.”

Relasiona ho preokupasaun makaas hodi hetan númeru traballadór iha setór agrikultura nian no difikuldade hodi prenxe pozisaun traballadór Australianu nian, Governu Austrália aumenta ona asesu ba traballadór sira husi rai liur atraves hasai tiha limitasaun ne’ebé uluk eziste iha setór balu.

Mudansa ne’e sei permite emprezariu sira Austrália nian atu responde diak liu-tan preokupasaun kona-ba ‘Seasonal Worker’, alende fó mos oportunidades ekonomiku ne’ebé siknifikante ba traballadór barak liu-tan husi Pasifíku no Timor-Leste.

Totál númeru servisu husi 3250 iha tinan 2014-2015 sei hasa’e to’o 4250 iha tinan 2015-2016. Kuaze Timor-oan liu nain 200 mak partisipa tiha ona iha pograma ne’e desde Timor-Leste hahú tama iha Programa ‘Seasonal Worker’ iha tinan 2012.

Traballadór sira bele haruka osan ba sira nia família maizoumenus $5000 (Rihun-lima dolares Australianu) kada fulan neen durante servisu ba programa ne’e - boot liu estandar salariál iha nasaun maioria ne’ebé partisipa daudaun iha programa ne’e. Ne’e sei lori benéfisiu sosiál no ekonomiku ne’ebé diak ba sira nia an rasik, família no komunidade.

Feto no mane ne’ebé ho idade 21 ba leten mak sei elijivél ba programa ne’e. Sira presiza kompleta ona estudu iha nivél sekundaria, bele koalia lian Inglés, prontu no iha vontade atu serbisu makaas. Ba informasaun klaru liu-tan kona-ba programa ne’e iha Timor-Leste, bele kontaktu SEPFOPE.